काठमाडौं । सम्भवत आज साँझ सम्म नेपाल प्रहरीले नयाँ आईजीपी पाउने छ । आईजीपी छनौटकै लागि आज मंगलबार अपरान्ह ४ बजे मन्त्रिपरिषद बैठक बस्दैछ ।
वर्तमा प्रहरी महानिरीक्षक (आईजीपी) ठाकुरप्रसाद ज्ञवालीले ३० वर्षे सेवा अवधिका कारण बुधबारबाट अवकाश पाउने भएकाले नयाँ आइजीपी छनौटका लागि मन्त्रीपरिषद बैठक डाकिएको बताईएको छ । ज्ञवालीसँगै प्रहरी अतिरिक्त महानिरीक्षक (एआईजी) तारिणीप्रसाद लम्साल र प्रहरी नायब महानिरीक्षक (डीआईजी) सूर्यप्रसाद उपाध्यायले पनि प्रहरी सेवाबाट अवकाश पाउनेछन् ।
नयाँ महानिरीक्षक बन्ने दौडमा एआईजी शैलेश थापा क्षेत्री र हरिबहादुर पाल छन् । यस अघिका महानिरीक्षक छनौट गर्दा जस्तो यसपटक प्रहरी संगठनमा अस्वस्थ प्रतिस्पर्धा भएको देखिएको छैन । थापाको संगठनमा इमान्दार र कर्तब्यनिष्ठ अधिकृतका रुपमा पहिचान बनाएका छन् भने पाल कमाण्ड कन्ट्रोलका साथै कुशल संगठककारुपमा चिनिन्छन् ।
प्रहरी प्रधान कार्यालय, नक्सालले भने आईजीपी ज्ञवालीको बुधबार विदाइ कार्यक्रम राखेको छ । सँगै नयाँ आईजीपीको स्वागत कार्यक्रम पनि राखिएको प्रहरी प्रधान कार्यालय, नक्सालले जनाएको छ ।
प्रतिक्रिया