बुटवल । प्रदेश ५ सरकारले स्थापना गरेको कोभिड-१९ नियन्त्रण तथा उपचार कोषका लागि सूर्य नेपाल प्रालीले १ करोड रुपैयाँ सहयोग गरेको छ ।
प्रदेश ५ सरकारका मुख्यमन्त्री शंकर पोखरेलको निवासमा आयोजित एक कार्यक्रमकाबीच प्रालीका उपाध्यक्ष रवि केसीले मुख्यमन्त्री पोखरेललाई १ करोड रकमको चेक हस्तान्तरण गरे ।
सहयोग रकम ग्रहण गर्दै मुख्यमन्त्री पोखरेलले कोरोना कोषमा भएको रकम खर्च गर्ने छुट्टै कार्यविधि र संयन्त्र रहेको र कोरोना संक्रमण निर्मूल नहुन्जेलसम्म कोषमा भएको रकम अन्यत्र खर्च नहुने बताए । पोखरेलले कोभिड-१९ कोषमा रकम सहयोग गरेकोमा सूर्य नेपाललाई धन्यवाद ज्ञापन गरे ।
पोखरेलले प्रदेशमा करिब ४ हजार संक्रमित फेला परेकोमा अहिले भने ८० प्रतिशत भन्दा धेरै व्यक्ति निको भएर घर फर्किएको जानकारी दिए ।
उनले प्रदेश ५ मात्र नभई ५२ वटा जिल्लाका नागरिकहरु भारतबाट यहि प्रदेशका नाका प्रयोग गरि भित्रिँदा एकैपटक धेरै संक्रमित फेला परेको भएपनि अहिलेभने अवस्था नियन्त्रणतर्फ गएको बताए ।
मुख्यमन्त्री पोखरेललाई चेक हस्तान्तरण गर्दै सूर्य नेपालका उपाध्यक्ष केसीले कोरोना कोषमा उपलब्ध गराएको रकम कोरोना नियन्त्रण तथा उपचारका लागि उपकरण खरिदमा खर्च गर्न आग्रह गरे ।
सूर्य नेपालले प्रत्येक प्रदेशलाई १,१ करोड सहयोग गर्ने यस अघि नै घोषणा गरेको थियो ।
प्रतिक्रिया