अर्थमन्त्री युवराज खतिवडा भन्छन, राष्ट्रिय गौरवका आयोजनामा पैसाको खाँचो हुँदैन

काठमाडौं ।अर्थमन्त्री युवराज खतिवडाले राष्ट्रिय गौरवका आयोजनामा पैसाको खाँचो नहुने बताएका छन् ।

राष्ट्रियसभा, राष्ट्रिय सरोकार समितिको बैठकमा बोल्दै मन्त्री खतिवडाले कोभिड–१९ ले समग्र अर्थतन्त्रमा प्रभाव पारेको अवस्थामा अन्य शीर्षकमा रहेका खर्च रकमान्तर गरेर र दातृ निकायबाट परिपूर्ति गरेर भएपनि राष्ट्रिय गौरवका आयोजनामा बजेट कमी हुन नदिने बताएका हुन ।

राष्ट्रिय गौरवका आयोजनामा छुट्टै कानून बनाएपछि त्यसले आयोजना कार्यान्वयनमा केही सहज हुने अर्थमन्त्री खतिवडाले बताए ।

मन्त्री खतिवडाले दुई वर्ष पहिले संसदमा सो सम्बन्धी विधेयक पेस गरेका थिए । व्यावसायिक सम्भाव्यता रहेका आयोजनालाई सार्वजनिक निजी साझेदारी मोडलमा अघि बढाउन सकिने उनले बताए ।

राष्ट्रिय गौरवका आयोजनामा रहेका अन्तरनिकाय समन्वय, निर्माण सामग्रीको सहज उपलब्ध नहुनुलगायतका समस्या समाधान गरिने मन्त्री खतिवडाको भनाइ थियो ।

कतिपय आयोजना डिजाइन हुँदाको समयभन्दा अहिलेको आवश्यकता फरक हुनसक्ने खतिवडाको भनाई थियो ।