काठमाडौं । ललितपुरको मेडिसिटी अस्पतालमा उपचाररत जनकपुरका पूर्वमेयर एवं होटेल रामाका सन्चालक कृष्ण गिरीको कोरोना संक्रमणबाट मृत्यु भएको छ ।
७३ वर्षीय गिरीको उपचारको क्रममा मंगलबार राति मृत्यु भएको हो । गिरीलाई १५ दिन अघि कोरोना संक्रमण पुष्टि भएको थियो ।
उनको अवस्था बिग्रिँदै गएपछि केहिदिन पहिले काठमाडौं ल्याएर मेडिसिटीमा भर्ना गरिको थियो ।
श्वासप्रश्वासमा गम्भीर समस्या देखिएका गिरीलाई एक सातादेखि भेन्टिलेटरमा राखेर उपचार गरिँदै आएको थियो । गिरी मुटु सम्बन्धी रोग, उच्च रक्तचापबाट पीडित थिए ।
पञ्चायतकालको अन्तिम वर्षतिर २०४४ सालमा जनकपुर नगरपालिकाको मेयर भएका गिरी पछिल्लो समय होटल व्यवसायीको रुपमा प्रतिष्ठित बनेका थिए ।
मृत्युबारे अस्पतालले भने आधिकारिक धारणा सार्वजनिक गरेको छैन । यससँगै बुधबार मात्रै ६ जना कोरोना संक्रमितको मृत्यु भएको समाचार सार्वजनिक भएको छ । जसअनुसार हालसम्म मृत्यु हुनेको संख्या ८९ पुगेको छ ।
प्रतिक्रिया