बुटवलमा थपिए २४ नयाँ संक्रमित, होम आइसोलेसनमा १६९ जनाको उपचार हुँदै

बुटवल । स्वास्थ्य कार्यालय रुपन्देहीले बुटवल उपमहानगरपालिकामा १७ जना संक्रमित थपिएको बिज्ञप्ति प्रकाशित गरेको १ घण्टा भित्रमा बुटवल उपमहानगरपालिकाको स्वास्थ्य शाखाले उपमहानगरमा २४ जना नयाँ संक्रमित थपिएको जानकारी दिएको छ ।

उपमहानगरले प्रकाशित बिज्ञप्ति अनुसार पछिल्लो २४ घण्टामा बुटवलमा १० महिला र १४ पुरुषमा संक्रमण पुष्टि भएको छ । बुटवलमा शुक्रबार वार्ड नम्बर ९ मा ८ जना संक्रमित थपिएका छन् भने वार्ड नखुलेको ६ जना संक्रमित भेटिएका छन् । त्यसैगरि वार्ड नम्बर १२ मा ४ जना, वार्ड नम्बर १३ मा २ जना तथा वार्ड नम्बर ३, ५, ६, ८ मा १।१ जना संक्रमित थपिएका छन् ।

बुटवलमा शुक्रबार सम्मा २५८ जनामा संक्रमण पुष्टि भएको र ५१ जना कोरोना मुक्त, भएर डिस्चार्ज भएको उपमहानगरका स्वास्थ्य शाखा प्रमुख कुन्दन कुमार सिंहले बताए । सिंहका अनुसार १६९ जना होम आइसोलेसनमा बसेर उपचार गराईरहेका छन् । उपमहानगरको एन्फा आइसोलेसनमा ४७ जनाको उपचार भईरहेको छ । बुटवलमा २ जनाको मृत्यु भईसकेको छ ।