काठमाडौं । रासायनिक मल नल्याएर आम किसानको छातीमा लात हान्ने बद्नाम दुई ठेकेदार कम्पनीलाई सरकारले कार्वाही गरेको छ ।
सारदा अधिकारीको शैलुङ इन्टरप्राइजेज र हरेराम कोइरालाको होनिको मल्टिपललाई कारवाही गरेको हो ।
कृषि सामग्री कम्पनी लिमिटेडसँग २५/२५ हजार मेट्रिक टन युरिया आपूर्ति सम्झौता गरेर पनि आयात नगरेपछि यि कम्पनीलाई कार्वाही गरिएको छ ।
कृषि मन्त्रालय अन्तर्गतको सो कम्पनीले मल आपूर्तिका लागि ठेक्का लगाएकाे थियो।
शैलुङ इन्टरप्राइजेज र होनिको मल्टिपल कम्पनीले भदौ २० गतेसम्म मलको सबै परिणाम ल्याउनुपर्ने थियो । तर, दुबै कम्पनीले मल आयातको प्रकियासमेत सुरू गरेका थिएनन् ।
कृषि सामग्री कम्पनीको आइतबार बसेको बैठकले दुबै कम्पनी ठेक्का रद्द गर्ने, धरौटी जफत गर्ने, क्षतिपूर्ति भराउने र कम्पनीलाई कालो सूचीमा राख्ने निर्णय गरेको छ ।
दुवै कम्पनीले ५/५ करोड रूपैयाँ धरौटी राखेका थिए ।
शक्ति र पहुँचका आधारमा मल आयात नगर्ने यि दुबै कम्पनीले पुन: म्याद थपका लागि शुक्रबार कृषि कम्पनीमा निवेदन दिएका थिए ।
तर अत्याधिक आलोचना भएपछि सरकार उनीहरूलाई कार्वाही गर्ने निस्कर्षमा पुगेको हो ।
ठेकेदारहरूलाई कारवाही नै भएपनि यसवर्षको वर्षेखेती सिजनमा देशकै प्रमुख कृषिबाली धान खेतिका लागि मलको हाहाकार समाधान नहुने भएको छ ।
प्रतिक्रिया