कपिलवस्तु । नेपालमा पहिलो पटक कोरोना भाइरसको संक्रमणबाट पत्रकारको मृत्यु भएको छ ।
कोरोना संक्रमणबाट कपिलवस्तु नगरपालिका १ तौलिहवा निवासी ६२ वर्षीय बनारसी बर्माको सोमबार मृत्यु भएको हो ।
मिर्गौलाको समस्या, सुगर र उच्च रक्तचापबाट पीडित पत्रकारको मृत्युपछि कोरोना पुष्टि भएको स्वास्थ्य कार्यालय कपिलवस्तुका कोरोना फोकल पर्सन कुमार थापाले जानकारी दिए ।
मृत्युपछि उनको स्वाब संकलन गरेर लुम्बिनी प्रादेशिक अस्पतालको प्रयोगशालामा पठाइएको र बेलुकी रिपोर्ट पोजेटिभ आएको स्वास्थ्य कार्यालय कपिलवस्तुले जनाएको छ ।
दीर्घ रोगबाट पीडित पत्रकारको बिहान निवासमै श्वास प्रश्वासमा समस्या आएपछि अस्पताल पु¥याएका थिए । परिवारले सामान्य रुघाखोकी जस्तै लक्षण देखिएको र स्वास प्रश्वासमा समस्या देखिएपछि अस्पताल लगेका वर्माको अस्पतालले मृत्यु भएको पुष्टी गरेको थियो ।
उनले केही समयदेखि भैरहवा युनिभर्सल मेडिकल कलेजमा किड्नीको डायलाइसिस गर्दै आएका थिए । मृतक पत्रकारका छोरालाई १४ दिन अघि कोरोना संक्रमण भएको थियो । उनी आइसोलेसनमा छन् । संक्रमण कहाँबाट कसरी फैलियो भन्ने यकिन भएको छैन् ।
बर्मा नेपाल टेलिभिजनमा कपिलवस्तुबाट लामो समयसम्म काम गरेका थिए भने नेपाल पत्रकार महासंघ कपिलवस्तुका पूर्व उपाध्यक्ष समेत रहेका थिए ।
प्रतिक्रिया