काठमाडौं । स्वास्थ्य तथा जनसंख्या मन्त्रालयले काठमाडौं उपत्यकामा अझै एक साता निषेधाज्ञा लम्ब्याउन सुझाव दिएको छ ।
कोरोना संक्रमण दर अझै नघटेको भन्दै मन्त्रालयले जारी निषेधाज्ञालाई एक साता थप्न सुझाव दिएको हो ।
अबको एक साता निषेधाज्ञा लम्ब्याए महामारी नियन्त्रण गर्न सहज हुने मन्त्रालयको निस्कर्ष रहेको छ ।
काठमाडौं उपत्यकामा आज मध्यराति १२ बजेदेखि निषेधाज्ञा अवधी सकिँदैछ ।
दुई सय बढी एक्टिभ केस भएका ठाउँमा लकडाउन र पाँच सय बढी एक्टिभ केस भएका ठाउँमा कर्फ्यु नै लगाउने भन्ने स्वास्थ्यको मापदण्ड रहेका कारण त्यसैअनुसार चल्नुपर्ने मन्त्रालयका प्रमुख विशेषज्ञ महेन्द्रप्रसाद श्रेष्ठले बताए ।
उपत्यकामा जोखिम अझै नघटेको भन्दै मन्त्रालयका कोभिड–१९ इन्सिडेन्ट कमाण्ड सिस्टम (आईसीएस) प्रमुख डा. गुणराज लोहनीले जनस्वास्थ्यको हितका लागि निषेधाज्ञालाई निरन्तरता दिनु पर्ने जिकिर गरे ।
अहिले निषेधाज्ञालाई खुला गरे घना बस्ती भएको उपत्यकाको संक्रमण झन बढी फैलिने स्वास्थ्य मन्त्रालयको निस्कर्ष रहेको छ । संक्रमितहरु बढ्दै जाँदा स्वास्थ्यकर्मी र चिकित्सकहरुलाई थप प्रेसर पर्ने भन्दै मन्त्रालयले निषेधाज्ञालाई खुला नगर्न सुझाव दिएको हो ।
तर, तीन सातादेखिको लगातार निषेधाज्ञाका कारण आम मानिसको जनजीवन प्रभावित भएको र अर्थतन्त्र चौपट भएको भन्दै विकल्प खोज्न दबाब बढेको छ ।
प्रतिक्रिया