नेपालगन्ज । बाँकेको नेपालगन्जमा भेरी कोरोना विशेष अस्पताल सञ्चालनमा आएको छ ।
एसी, सिसि क्यामरा र भेन्टिलेटर सहितको सुविधा सम्पन्न कोरोना विशेष अस्पतालको आज बिहीबार उद्घाटन भएको हो ।
कोरोना भाइरस (कोभिड १९) संक्रमित विरामीहरुका लागि निर्माण गरिएको भेरी कोरोना विशेष अस्पताल एक कार्यक्रमकाबीच प्रदेश नं. ५ सामाजिक विकास मन्त्रालयका सामाजिक विकास मन्त्री सुदर्शन बरालले उद्घाटन गरेका हुन् ।
एक सय बेड सहितको कोरोना विशेष अस्पतालमा ७ वटा भेन्टिलेटर सहितको बेड रहेको भेरी अस्पताल विकास समितिका अध्यक्ष प्रमोद धितालले जानकारी गराए ।
अहिलेलाई ओपीडी सेवा, आइसोलेसनको व्यवस्था र आईसीयू सेवा दिने गरी विशेष अस्पताल संचालनमा ल्याएकोे अस्पतालले जनाएको छ । पछिल्लो समय बाँकेमा कोरोना संक्रमितको संख्या बढदै गएको हुनाले कोरोना अस्पतालमा बढि जोड दिएको अस्पताल विकास समितिका अध्यक्ष धितालले जानकारी गराए ।
‘एसी, सिसि क्यामरा, भेन्टिलेटर, बाथरुमको राम्रो व्यवस्थाका साथ कोरोना विशेष अस्पताल संचालनमा ल्याएका छौं’, उनले भने । गम्भीर प्रकृतिका विरामीलाई उपचार गर्न सहज तरिकाले कोरोना विशेष अस्पतालको व्यवस्था गरिएको उनले बताए ।
बाँकेमा नेपालगन्ज मेडिकल कलेज शिक्षण अस्पताल कोहलपुर र सुशील कोइराला प्रखर क्यान्सर अस्पताल खजुरालाई विशेष कोरोना अस्पतालको रुपमा लिइएको छ । बाँकेमा कोरोनाका कारण ८ जनाको मृत्यु भएको छ ।
प्रतिक्रिया