काठमाडौं । नेपाल कम्युनिष्ट पार्टी (नेकपा)को स्थायी कमिटी बैठक आज बस्दैछ । गत असार १० गते सुरु भै साउन १३ गतेबाट अनिश्चितकालीन स्थगित भएको बैठक आज बस्न लागेको हो ।
पार्टीका दुई अध्यक्ष केपी शर्मा ओली र पुष्पकमल दाहाल प्रचण्डबीच बढेको चरम अविश्वास, आशंकाका कारण अलपत्र परेको बैठक पुनः दुई अध्यक्षबीच समझदारी बढेसँगै बस्न थालेको हो ।
शिर्ष नेतृत्वबीच बढेको गुटबन्दीका कारण असार १६ गते बैठक प्रभावित बनेको थियो । प्रचण्ड र माधव नेपाल पक्षीय नेताहरुले प्रधामन्त्री र अध्यक्ष दुवै पदबाट ओलीको राजीनामा मागेपछि भाँडिएको बैठक अन्तिमपटक साउन १३ गते अनौपचारिक रुपमा बसेको थियो ।
तर, पार्टी एकताका पक्षधर नेताहरुको निरन्तर दबाब र फुट विभाजनबाट केही प्राप्त नहुने नेतृत्वको निस्कर्षका बीच सहमतिको विन्दु फेलापरेपछि अध्यक्षद्वय ओली र प्रचण्ड पार्टीलाई समझदारीका साथ अघि बढाउन तयार भएका थिए ।
यसबीचमा पार्टीभित्र बढेको विवाद समाधानको खोजी गर्दै सुझाव दिन महासचिव विष्णु पौडेलको नेतृत्वमा कार्यदल बनेको थियो । कार्यदलले दिएको प्रतिवेदनलाई समेत मनन गर्दै अध्यक्षद्वयले स्थायी कमिटीको आजको बैठकमा पेश गर्नेगरी राजनीतिक प्रस्ताव तयार गरेका छन् ।
स्थायी कमिटी सदस्यहरुको हातमा पुग्नु अघि नै संचारमाध्यमलाई पुर्याइएको सो प्रस्तावमा पार्टीभित्रको गुटवन्दीलाई अन्त्य गर्न केही निर्देशन समेत दिने विषय समेटिएको छ ।
आजको स्थायी कमिटी बैठकमा दुई अध्यक्षको साझा प्रस्तावमाथि छलफल भै पारित गरिने महासचिव विष्णु पौडेलले बताएका छन् । कमिटी सदस्यहरुका सुझावलाई समेटेर प्रस्ताव पारित हुने पौडेले जनाए ।
यसअघिको स्थायी कमिटी बैठकका अलपत्र परेका एजेण्डा अब अध्यक्षद्वयकै राजनीतिक प्रस्तावमा समेटिएको छ । यसअघि सरकार संचालनको विषय र बहुविवादित अमेरिकी मिलेनियम च्यालेन्ज कर्पोरेशन (एमसीसी) सम्झौता महत्वपूर्ण एजेण्डाले छलफलमा स्थान नै पाएका थिएनन् ।
अध्यक्षद्वयको प्रस्तावममा पार्टीको कार्यदलले दिएको सझावलाई समेट्दै एमसीसीलाई परिमार्जनसहित पारित गर्ने विषय उल्लेख गरिएको छ ।
प्रतिक्रिया