काठमाडौं । विगत केही दिनदेखि कोरोना भाइरसको संक्रमणबाट मृत्यु हुने संख्या केही घटेको थियो । तर, शनिबार मृत्युको संख्या ह्वात्तै माथि पुगेको छ ।
शनिबार देशभरका विभिन्न अस्पतालमा उपचाररत १४ जना कोरोना संक्रमितको मृत्यु भएको स्वास्थ्य तथा जनसंख्या मन्त्रालयले जनाएको छ ।
मन्त्रालयले शनिबार अपरान्ह अपडेट गरेको पछिल्लो तथ्यांक अनुसार ३ जना महिला र ११ जना पुरुषको मृत्यु भएको हो ।
तीन जना मृतक काठमाडौंका रहेका छन् । ७६ वर्षीया महिला एवं ५१ र ५४ वर्षीय पुरुषको मृत्यु भएको मन्त्रालयले जनाएको छ ।
यस्तै, भक्तपुरका ७२ र ३८ वर्षका दुई पुरुष र चितवनका ६१ वर्षका पुरुषको पनि मृत्यु भएको छ ।
यसैगरी रुपन्देहीका ६० र ४० वर्षीय दुई पुरुषको मृत्यु भएको छ भने कास्कीका ५१ वर्षीय एक जना पुरुषको मृत्यु भएको छ ।
यसैगरी पर्साका ७८ वर्षीया महिला र तनहुँका ७६ वर्षीया महिलाको निधन भएको मन्त्रालयले जनाएको छ ।
यस्तै, स्याङ्ग्जाका ८५ वर्षीय पुरुष र गोखराका ५१ वर्षीय पुरुषको पनि मृत्यु भएको छ ।
हालसम्म देशभर ३३६ जनाले कोरोना संक्रमणबाट ज्यान गुमाएका छन् । कोरोनाको मृत्युदर ० दशमलव ६३ प्रतिशत रहेको छ ।
प्रतिक्रिया