ओहो ! एकै दिन थपिए २ हजार २० नयाँ संक्रमित

काठमाडौं । आज असोज २ गते शुक्रबार । नेपालमा कोरोना भाइरसका २ हजार २० जना संक्रमित थपिएका छन् ।

११ हजार ४५८ पीसीआर परीक्षण गर्दा २ हजार २० जनामा संक्रमण पुष्टि भएको स्वास्थ्य तथा जनसंख्या मन्त्रालयका प्रवक्ता प्राडा जागेश्वर गौतमले जानकारी दिएका छन् ।

एकै दिन यतिधेरै संख्यामा संक्रमित थपिएको यो नै पहिलो पटक हो । यसँगै हालसम्म संक्रमित हुनेको संख्या ६१ हजार ५९३ पुगेको छ ।

देशभर सक्रिय संक्रमितको संख्या शुक्रबार १७ हजार ३८३ रहेको छ ।

जसमध्ये संस्थागत आइसोलेनमा ९ हजार २९५ जना रहेका छन् । यस्तै होम आइसोलेसनमा ८ हजार ८८ जना रहेका छन् ।

शुक्रबार ८७१ जना संक्रमित निको भएर घर फर्किएका छन् । हालसम्म निको हुनेको संख्या ४३ हजार ८२० पुगेको छ ।