संवैधानिक निकायहरुमा पदपूर्ति गर्न सरकारलाई नेकपाको आग्रह

काठमाडौं । सत्तारुढ नेपाल कम्युनिस्ट पार्टी (नेकपा)ले संवैधानिक निकायहरुमा रहेको रिक्त पदहरुमा यथाशीघ्र पदपूर्ति गर्न सरकारलाई आग्रह गरेको छ ।

आइतबारदेखि जारी सचिवालयको मंगलबार बसेको बैठकले विभिन्न संवैधानिक निकायका कैयौं पदहरु पूर्तिगर्न संवैधानिक परिषद्को बैठक आह्वान गर्न प्रधानमन्त्रीलाई आग्रह गरेको प्रवक्ता नारायणकाजी श्रेष्ठले जानकारी दिए । संवैधानिक परिषद्को बैठकमार्फत पदपूर्तिको प्रक्रिया अघि बढाउन प्रधानमन्त्रीलाई आग्रह गरेको श्रेष्ठले बताए।

बैठकमा आइतबार छलफल भएको मन्त्रिपरिषद् पुनर्गठनबारे भने आज छलफल नै भएन । प्रवक्ता श्रेष्ठले भने, ‘मन्त्रिपरिषद् पुनर्गठनका बारेमा अस्ति भएको बाहेक थप छलफल भएको छैन’ ।

बैठकले सांगठनिक एकताका बाँकी कामलाई पुरा गर्ने विषयमा छलफल गरेको छ । सांगठनिक एकताबारे प्रस्ताव ल्याउन पार्टी अध्यक्ष र महासचिवलाई १० दिनको समय दिइएको प्रवक्ता श्रेष्ठले जानकारी दिए ।