बाँकेमा कोरोना कहर : ५ मिनेटको अन्तरमा दुई जनाको मृत्यु

नेपालगञ्ज । कोरोना संक्रमणबाट बाँकेमा ५ मिनेटको अन्तरमा थप दुई जनाको मृत्यु भएको छ ।

नेपालगञ्ज उपमहानगरपालिका-१० ट्राफिक चोकका ८४ वर्षीय वृद्धा पुरुषको राति ९:५५ बजे र कोहलपुर नगरपालिका-८, गोल्छा, की ७१ वर्षीय वृद्ध महिला राति १ं० बजे उपचारका क्रममा दुबै जनाको भेरी अस्पताल नेपालगंजमा मृत्यु भएको हो ।

नेपालगञ्जका पुरुषलाइ स्वास्थ्यमा समस्या देखिएपछि गत असोज ६ गते बागेश्वरी डाइग्नोस्टिक सेन्टर नेपालगञ्जबाट उनको स्वाब संकलन गरि ७ गते उनमा कोरोना पुष्टि भएको थियो । उनलाई सोही दिन साँझ साढे ५ बजे भेरी अस्पतालको भेन्टिलेटरमा भर्ना गरी उपचार शुरु गरिएको थियो ।

उपचारकै अवस्थामा उनको स्वास्थ्य अवस्था बिग्रदै गएपछि दिनुपर्ने सबै प्रकारको उपचार दिँदा पनि स्वास्थ्यमा सुधार नभएको र शनिबार राति ९:५५ बजे मृत्यु जिल्ला जनस्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिए ।

उनका अनुसार मृतक व्यक्तिमा स्वास प्रश्वासको समस्या रहेको थियो ।

त्यस्तै असोज १४ गते अस्पताल भर्ना भएकी कोहलपुर नगरपालिका-८ , गोल्छाकी वृद्ध महिलाको श्वासप्रश्वासमा समस्या थियो । संक्रमित महिलालाई रोगको प्रकृति अनुसार गरिनुपर्ने सबै प्रकारको उपचार दिदै गर्दा समेत विरामीको अवस्थामा सुधार नआएपछी आइसीयूमा उपचारकै क्रममा शनिबार राति १० बजे मृत्यु भएको श्रेष्ठले खबरकुरालाई बताए ।

मृतक वृद्ध महिलाको असोज १४ गते स्वाब संकलन गरिएको थियो भने पीसीआर रिपोर्ट पनि असोज १४ गते नै पोजिटिभ आएको थियो ।

योसँगै बाँकेमा कोरोनाबाट मृत्यु हुनेको संख्या २६ पुगेको छ ।