नेपालगन्ज । बाँकेका बिभिन्न आइसोलेसनमा बसेर उपचार गराईरहेका १५७ कोरोना संक्रमितहरुले घरमै गएर दशैं मनाउन पाउने भएका छन् । सरकारले आइसोलेसनको अवधि घटाएर १० दिन बनाए पछि उनीहरुले घरमा दशैं मनाउन पाउने भएका हुन् ।
नयाँ मापदण्ड अनुसार बाँकेबाट आज १५७ जना कोरोना संक्रमितलाई डिस्चार्ज गर्ने निर्णय गरिएको छ । स्वास्थ्य तथा जनसंख्या मन्त्रालयले आइसोलेसन अवधिलाई संशोधन गर्दै १० दिन सम्म कुनै लक्षण नदेखिएका थप ७ दिन घरमा आइसोलेट हुने गरि डिस्चार्ज गर्ने परिपत्र गरे अनुसार डिस्चार्ज गर्ने पत्र आएपछि आईतबार १५७ जनालाई घर पठाउन लागिएको जिल्ला कोरोना बिपद व्यवस्थापन केन्द्रका कोरोना फोकलपर्शन नरेश श्रेष्ठले बताए ।
यस अघि १४ दिन संक्रमितहरु आइसोलेसन बस्नु पर्ने र थप ७ दिन घरमा क्यारेन्टिन बस्नु पर्ने व्यवस्था रहेको थियो । बाँकेमा आज गरिएको डिस्चार्ज अहिले सम्मकै बढी हो ।
बाँकेमा आज सम्ममा २५१४ जना कोरोना मुक्त भएर घर फर्केका छन् भने ३० जनाको उपचारका क्रममा मृत्यु भईसकेको छ । आज डिस्चार्ज भएसँगै बाँके कोरोनाको अति जोखिम जिल्लाबाट मुक्त भएको छ । सरकारले ५०० बढी सक्रिय संक्रमित रहेको जिल्लालाई अति जोखिममा राखेपनि बाँकेमा आजबाट ४३३ जनामात्र आईसोलेसनमा बाँकी रहेकाले जिल्ला जोखिम मुक्त जिल्ला बनेको हो ।
प्रतिक्रिया