रुपन्देहीका ९९ जनाले दशैं मान्न नपाउने भए, कोरोना संक्रमितको संख्या ६ हजार नजिक पुग्यो

बुटवल । वडा दशैंका पूर्वसंध्यामा रुपन्देहीका ९९ जनामा कोरोना संक्रमण पुष्टि भएको छ । स्वास्थ्य कार्यालय रुपन्देहीका अनुसार आईतबार ३७ महिला ६२ पुरुषमा कोरोना संक्रमण पुष्टि भएको हो । वडा दशैंको टिका थाप्ने तयारी गरिरहेका उनीहरुको पीसीआर रिपोर्ट पोजिटिभ आएपछि टिका थाप्नबाट बन्चित भएका छन् ।

आईतबार थपिएका कोरोना संक्रमितहरुमा बुटवलमा ४२ जना, तिलोत्तमामा ३१ जना, सिद्धार्थनगरमा १४ जना, सैनामैना र सुद्धाधनमा ४।४ जना तथा दृवदह, कन्चन, सियारी र ओमसतियामा १।१ जना कोरोना संक्रमित थपिएको स्वास्थ्य कार्यालयको प्रेस नोटमा उल्लेख गरिएको छ ।

जिल्लामा हालसम्म कुल संक्रमितको संख्या ५८०६ जना पुगेका छन् भने ६२ जना संक्रमितको उपचारका क्रममा ज्यान गएको छ । अहिले पनि रुपन्देहीमा २२३७ जना बिभिन्न आइसोलेसनमा बसेर उपचार गराईरहेका छन् ।