दाङ । भारतको जम्मुकश्मीरमा शुक्रबार भएको भिडन्तमा भारतीय सेनामा कार्यरत दाङ तुलसीपुरका एक युवकको मृत्यु भएको छ ।
आज बिहान ५ बजे रजौरी जिल्लाको सुन्दरबनी सेक्टरमा गोली लागेर तुलसीपुर उपमहानगरपालिका वडा नं.९ बेलुवा निवासी ३० बर्षीय प्रेमबहादुर खत्री र राइफलम्यान सुखवीर सिंहको मृत्यु भएको हो ।
पाकिस्तानी क्षेत्रबाट चलेको गोली लागेर गम्भीर घाइते दुवैको मृत्यु भएको भारतीय रक्षा मन्त्रालयले जनाएको छ ।
कश्मीरबाट आज बिहान लखनउ आइपुग्ने छोराको शव लिन पिता लालबहादुर शुक्रबारै त्यसर्फ गएको बेलुवा प्रहरी चौकीका इन्चार्ज असई प्रदीप खड्काले बताए । खत्रीका आमाबुबा, श्रीमती, ७ वर्षीय छोरी र ५ वर्षीय छोरा छन् ।
गत चैतअघि दुई महिने बिदामा आएर घर बसेर गएका उनी नियमित फोन सम्पर्कमा रहेको र बिहीबार राति मात्रै भिडियो कलमा कुराकानी भएको छिमेकी तुलसी केसीले बताए ।
प्रतिक्रिया