काठमाडौं । चिनियाँ रक्षामन्त्री एवं स्टेट काउन्सिलर वेई फेङहीले भोलि आइतबार नेपाल भ्रमण गर्नेभएका छन् ।
परराष्ट्रमन्त्रालयले रक्षामन्त्री वेईको एक दिने नेपाल भ्रमणको औपचारिक जानकारी दिएको छ । भ्रमणका क्रममा वेईले राष्ट्रपति विद्यादेवी भण्डारी, प्रधानमन्त्री केपी शर्मा ओलीसँग भेट गर्नेछन् ।
उनले उपप्रधानमन्त्री एवं पूर्व रक्षामन्त्री इश्वर पोखरेललाई पनि भेट गर्नेछन् । पोखरेलले नै गतवर्ष वेईलाई नेपाल भ्रमणको निम्तो दिएका थिए । यसैगरी चिनियाँ रक्षमन्त्री वेईले नेपाली सेनाका प्रधानसेनापति पूर्णचन्द्र थापालाई पनि भेट गर्नेछन् ।
रक्षामन्त्री वेईले नेपाल र चीनबीचको सम्बन्धका आयाम एवं नेपाली सेना र चिनियाँ सेनाबीचको रक्षासहकार्यलाई अघि बढाउने विषयमा छलफल गर्ने बुझिएको छ । वेई नेपालबाट आइतबार नै फर्किनेछन् ।
नेपालमा पछिल्लो केही समययता भारतीय उच्चअधिकारीहरुको निरन्तर भ्रमण भैरहेको सिलसिलामा चिनियाँ रक्षामन्त्रीको भ्रमणलाई अर्थपूर्ण मानिएको छ ।
भारतले नेपालमा चिनियाँ प्रभाव बढेको निस्कर्ष निकाल्दै त्यसलाई रोक्नका लागि विगतको तिक्कतालाई कम गर्दै सम्बन्ध सुधार्न प्रयत्न गरिरहेको छ । शुक्रबार मात्रै भारतीय विदेश सचिव हर्षवर्धन श्रृंगलाले दुई दिने नेपाल भ्रमण पुरा गरी स्वदेश फर्किएका छन् ।
श्रृंगला फर्किएको दुई दिनभित्रै चिनियाँ उच्चअधिकारीको नेपालमा आगमन हुन लागेको हो ।
प्रतिक्रिया