प्रधानमन्त्री केपी शर्मा ओलीको आह्वानमा बोलाइएको सर्वदलीय बैठक सुरु भएको छ ।
प्रधानमन्त्री निवास बालुवाटारमा बसेको बैठकमा संसदमा प्रतिनिधित्व गर्ने राजनीतिक दलका प्रमुखहरु रहेका छन् । संसदमा नेपाल कम्युनिष्ट पार्टी (नेकपा), नेपाली कांग्रेस, जनता समाजवादी पार्टी (जसपा), राष्ट्रिय प्रजातन्त्र पार्टी (राप्रपा), राष्ट्रिय जनमोर्चा र नेपाल मजदुर किसान पार्टी (नेमकिपा) रहेका छन् ।
कोरोना भाइरसको महामारी नियन्त्रण, गणतन्त्रका विरुद्धमा भैरहेको गतिविधि लगायत अन्य समसामयिक गतिविधिमाथि छलफल गर्न प्रधानमन्त्रीले सर्वदलीय बैठकको आह्वान गरेका हुन् ।
बैठकलाई स्वाग गर्दै प्रधानमन्त्री ओलीले कोभिड–१९ को नियन्त्रण, प्राप्त उपलब्धिहरूको रक्षा, संविधानविरोधी र हिंसात्मक गतिविधिहरूको विरोधमा एकजुट हुन सबैमा आग्रह गरेका छन् ।
सत्तारुढ दल नेकपाभित्रै प्रधानमन्त्री र अन्य नेताहरुबीच चलिरहेको अन्तसंघर्षकै बीच बोलाइएको सर्वदलीय बैठकलाई विशेष चासोका साथ हेरिएको छ ।
बैठकमा प्रधानमन्त्री ओली, नेकपा अध्यक्ष पुष्पकमल दाहाल प्रचण्ड, नेपाली काँग्रेसका सभापति शेरबहादुर देउवा लगायत सबै राजनीतिक दलका शिर्ष नेताहरु उपस्थित रहेका छन् ।
यसअघि प्रधानमन्त्री ओलीले भारतले अतिक्रमण गरेको नेपाली भूमि समेटेर नयाँ नक्शा जारी गर्ने समयमा पनि सर्वदलीय बैठक बोलाएका थिए
प्रतिक्रिया