धनगढी । प्रचण्ड नेपालले नेतृत्व गरेको नेपाल कम्युनिष्ट पार्टी नेकपाले सुदुरपश्चिमको राजधानी धनगढीमा विशाल सभा आयोजना गरेको छ ।
प्रधानमन्त्री केपी शर्मा ओलीले प्रतिनिधिसभा विघटन गरेपछि प्रतिगमन विरुद्ध सडक संघर्षमा रहेको प्रचण्ड नेपाल नेकपाले आज धनगढीमा विरोध प्रदर्शन र सभाको आयोजना गरेको हो ।
सभालाई नेकपाका अध्यक्षद्वय पुष्पकमल दाहाल प्रचण्ड र माधवकुमार नेपालले सम्बोधन गर्दैछन् ।
विरोध प्रदर्शन र सभामा भाग लिन सदुरपश्चिमका सबै जिल्लाबाट ठूलो समुहमा मानिसहरु धनगढीमा भेला भएका छन् । सभा सुरु हुनुअघि धनगढीको क्याम्पस चोक र चौराहा लगायतका स्थानबाट सुरु भएको प्रदर्शन खुला मञ्चमा पुगेर सभामा परिणत भएको छ ।
प्रदर्शन र सभामा विभिन्न समुदायका साँस्कृतिक झाँकी समेत प्रदर्शन गरिएको छ ।
यसअघि प्रचण्ड नेपाल पक्षले काठमाडौं, लुम्बिनी प्रदेशको बुटवल र प्रदेश १ को विराटनगरमा विशाल सभा सम्पन्न गरिसकेको छ ।
नेकपाले माघ २८ गते पुनः काठमाडौंमा अहिलेसम्मकै विशाल विरोध प्रदर्शन र सभा गर्ने तयारी गरिसकेको छ ।
तस्विर : विष्णु सापकोटा जुगल र विष्णु रिजालको फेसबुकबाट
प्रतिक्रिया