काठमाडौं । नेकपाको प्रचण्ड नेपाल पक्षका अध्यक्षद्वय पुष्पकमल दाहाल प्रचण्ड र माधवकुमार काठमाडौंको माइतीघरमा आयोजित धर्नामा सहभागी भएका छन् ।
सरकार विरुद्ध भैरहेको निरन्तरको देशव्यापी प्रदर्शन र सभामा उपस्थित हुँदै आएका अध्यक्षद्वय प्रचण्ड र नेपाल माइतीघर मण्डलामा आयोजित धर्ना कार्यक्रममा सहभागी भएका हुन् ।
धर्नामा सरकारले विघटन गरेको प्रतिनिधिसभाका सांसदहरु, संविधान सभा सदस्यहरु तथा प्रदेश सभा सदस्यहरू सहभागी भएका छन् । धर्नामा अध्यक्षद्वय लगायत प्रवक्ता नारायणकाजी श्रेष्ठ, अष्टलक्ष्मी शाक्य, लगायतका नेताहरु सभागी छन् ।
धर्नामा सहभागी सांसदहरुले सरकारले असंवैधानिक रूपमा संसद विघटन गरी देशलाई प्रतिगमनतर्फ फर्काउने उल्टो कदम सच्यचउन दबाबका लागि धर्नामा बसेको बताएका छन् ।
नेकपाको तेस्रो चरणको आन्दोलनअन्तर्गत संविधानसभाका सभासदहरु र पूर्व सांसदहरु माघ १४ गतेदेखि धर्नामा सहभागी भैरहेका छन् । बुधबारदेखि जारी धर्ना शनिबारबाहेक २१ गतेसम्म प्रत्येक दिन २ घन्टासम्म बस्ने नेकपाले बताएको छ ।
प्रतिनिधिसभा विघटन विरुद्ध प्रचण्ड नेपाल नेतृत्वको नेकपा गत पुष ५ गतेदेखि नै आन्दोलनमा रहँदै आएको छ ।
नेकपाले शनिबार धनगढीमा, शुक्रबार विराटनगरमा र बिहीबार बुटवलमा विशाल प्रदर्शन र सभा सम्पन्न गरिसकेको छ । यही माघ २८ गते काठमाडौंमा अहिलेसम्मकै सबैभन्दा ठूलो जनप्रदर्शन गर्ने नेकपाले दाबी गरेको छ ।
प्रतिक्रिया