सरकार र संसदबारे कांग्रेस र जसपासँग संवाद गर्ने माओवादी केन्द्रको निर्णय

काठमाडौं । नेकपा माओवादी केन्द्रले नयाँ सरकार र संसदबारे नेपाली काँग्रेस र जनता समाजवादी पार्टी जसपासँग संवाद गर्ने निर्णय गरेको छ ।

पार्टी कार्यालय पेरिसडाँडामा मंगलबार बसेको स्थायी कमिटी बैठकले तत्कालै दुवै दलसँग संवाद गर्ने निर्णय गरेको नेता नारायणकाजी श्रेष्ठले बताए । बैठकले नेकपा एमालेसँग पनि छलफल गर्ने निर्णय गरेको छ ।

बैठकले ओली सरकारलाई दिएको समर्थन भने फिर्ता लिएको छैन । नेता श्रेष्ठले भने, अहिले नै समर्थन फिर्ता लिनेबारे भने कुनै निर्णय भएको छैन । हामीले एमालेसँग पनि छलफल जारी राखेका छौँ । तर, अहिले मुख्य जोड नेपाली काँग्रेस र जसपासँगको छलफलमा छ ।’

बैठकले फागुन २९ गते केन्द्रीय कमिटीको बैठक र चैत्र १ गते कार्यकर्ता भेला गर्ने पनि निर्णय गरेको श्रेष्ठले बताए । बैठक भोलि दिउँसो पनि बस्नेछ ।