काठमाडौं । नेकपा माओवादीले नयाँ सरकार निर्माणका लागि थप गृहकार्य गर्ने निर्णय गरेको छ ।
पार्टी कार्यालय पेरिसडाँडामा बुधबार बसेको स्थायी कमिटी बैठकले नयाँ सत्ता समीकरणका लागि अन्य दलसँग थप छलफल गर्ने निर्णय गरेको हो ।
बैठकपछि संचारकर्मीसँग कुरा गर्दै नेता नारायणकाजी श्रेष्ठले सरकारलाई दिएको समर्थन तत्कालै फिर्ता नगर्ने निर्णय भएको बताए । श्रेष्ठले सर्वोच्च अदालतको फैसलापछि नैतिकताका आधारमा प्रधानमन्त्रीले राजीनामा गर्नुपर्नेमा नगरेको भन्दै अब अन्य दलहरुसँग छलफल गरेर निस्र्कषमा पुगिने बताए ।
श्रेष्ठले पुनर्स्थापित संसद दुई वर्ष चल्नुपर्ने र यही संसदले नयाँ सरकार दिनुपर्ने बताउँदै अन्य दलहरुसँग सरकार गठनबारे सबै विकल्पमा वार्ता र छलफललाई अघि बढाइने जनाए ।
बैठकमा अध्यक्ष प्रचण्डले कांग्रेस र जसपासँग मंगलबार भएको छलफलबारे जानकारी गराएका थिए ।
बैठकले संगठन निर्माणबारे निर्णय लिन चार सदस्यीय कार्यदल बनाएको छ । वर्षमान पुन, पम्फा भुसाल, जनार्दन शर्मा र गिरिराजमणि पोखरेल रहेको कार्यदल गठन गरिएको नेता श्रेष्ठले जानकारी दिए ।
प्रतिक्रिया