काठमाडौं । नेकपा एमालेको माधव झलनाथ पक्षले राष्ट्रिय भेला नरोक्ने निर्णय गरेको छ ।
काठमाडौंको अर्याल होटलमा आफु निकट केन्द्रीय सदस्यहरु र सांसदहरुसँग बैठकपछि चैत ४ र ५ गतेका लागि बोलाइएको राष्ट्रिय भेला नरोक्ने निर्णय गरेको हो ।
बैठकमा वरिष्ठ नेता माधवकुमार नेपालले सोमबार बिहान ओली पक्षसँग भएको बैठकबारे जानकारी गराएका थिए । ओलीसँग दुई घण्टाभन्दा बढी छलफल भएपनि कुनै सकारात्मक निस्कर्ष ननिस्किएको नेपाल पक्षको ठम्याई रहेको छ ।
नेता नेपालले ओलीसँगको छलफल ब्रिफिङ गर्दै ओली विवाद मिलाउने पक्षमा नरहेको बताएका थिए । ओलीले आफ्नो गुट भेला गरेर फागुन २८ गते गरेको निर्णय फिर्ता लिन तयार नभएको पनि उनले बताएका थिए ।
माधव झलनाथ पक्षले ओलीले बोलाएको चियापान कार्यक्रम पनि बहिस्कार गर्ने भएका छन् । नेताहरुले केन्द्रीय सदस्य र सांसदहरुलाई चियापानमा अनुपस्थित हुन निर्देशन दिएका छन् । ओलीको चियापान आफुहरुलाई भुलाउने रणनीति भएको उनीहरुको निस्कर्ष रहेको छ ।
प्रतिक्रिया