काठमाडौं । नेकपा माओवादी केन्द्रको संसदीय दलको नेतामा अध्यक्ष पुष्पकमल दाहाल प्रचण्ड चयन भएका छन ।
माआवादी केन्द्रको आज बसेको संसदीय दलको बैठकले प्रचण्डलाई संसदीय दलको नेतामा चयन गरेको हो ।
यसैगरी बैठकले राष्ट्रिय सभा दलको नेतामा दीनानाथ शर्मालाई चयन गरेको छ । यसअघि साविकको एमाले र माओवादी केन्द्र मिलेर बनेको नेकपामा पनि शर्मा राष्ट्रिय सभामा दलको नेता थिए । बैठकले देव गुरुङलाई प्रमुख सचेतकमा चयन गरेको छ ।
बैठकले संसदीय दलको विधान मस्यौदा गर्न ३ सदस्यीय समिति बनाएको छ । समितिमा देव गुरुङ, रामनारायण विडारी र रेखा शर्मा रहेका छन् ।
सर्वोच्च अदालतले नेकपा खारेज गरेर पुनः साविककै पार्टी गठन गर्न बाध्य बनाएपछि माओवादी केन्द्रले संसदीय दलका पदाधिकारी चयन गरेको हो । यद्यपी, संसदीय दलका उपनेता र प्रतिनिधिसभाका सचेतक चयन गर्न भने अझै बाँकी राखेको छ ।
बैठकले प्रधानमन्त्री केपी शर्मा ओली नैतिकताको आधारमा पदमा बस्न नमिल्ने भन्दै राजिनामाको माग समेत गरेको नेता वर्षमान पुनले बताए । उनले भने, – ‘प्रतिनिधि सभा विघटनको निर्णय गर्ने केपी शर्मा ओलीको कदम असंवैधानिक भएको अदालतले निर्णय गरिसकेको सन्दर्भमा उहाँले नैतिक रुपले पदमा रहिराख्न मिल्दैन । राजिनामा दिनुपर्छ भन्ने दलको अडानलाई स्पष्ट गरेको छ ।’ तर, माओवादी केन्द्रले हतारमा सरकारलाई दिएको समर्थन फिर्ता नलिने पनि सांसद पुनले स्पष्ट पारे ।
संसदीय दलको बैठकले पार्टी छाडेका २ जना राष्ट्रिय सभा सदस्य र ४ जना प्रतिनिधि सभा सदस्यहरुलाई दलको तर्फबाट आफ्नो स्थिति स्पष्ट पार्न पत्राचार गर्ने निर्णय गरेको छ ।
यसैगरी पार्टी परित्याग गरेका सांसदहरुसँग अन्तिम छलफल गर्नका लागि नारायणकाजी श्रेष्ठ, देव गुरुङ र वर्षमान पुनको ३ सदस्यीय समिति बनाएको छ । समितिले प्रत्यक्ष भेटेर छलफल गर्ने पनि निर्णय गरेको छ ।
प्रतिक्रिया