काठमाडौं । नेकपा एमालेको नेपाल पक्षीय स्थायी कमिटी सदस्यहरुको बैठक आज बस्ने भएको छ ।
एमालेका अध्यक्ष केपी शर्मा ओलीले वरिष्ठ नेता माधवकुमार नेपाल र उपाध्यक्ष भीम रावललाई पार्टी सदस्यताबाट ६ महिनाका लागि निलम्बन गरेपछि त्यस विरुद्ध रणनीति बनाउन नेपाल पक्षीय स्थायी कमिटी बैठक बस्न लागेको हो ।
सर्वोच्च अदालतले नेकपा एमाले ब्युँताइदिएपछि सो पार्टीभित्र अध्यक्ष ओली एवं वरिष्ठ नेताद्वय नेपाल र खनाल पक्षबीच तिब्र अन्तर्संघर्ष चर्किदै गएको छ ।
ओलीले नवौं महाधिवेशनको विधान विपरित शक्ति केन्द्रिकरण गर्दै उनको विरोधमा रहेका नेताहरु विरुद्ध कारवाहीको डण्डा चलाएको नेपाल पक्षधरको आरोप रहेको छ । तर ओलीले भने नेता नेपालले पार्टीमा आपराधिक गतिविधि गरेको भन्दै उनी विरुद्ध थप कारवाही गर्ने चेतावनी दिएका छन् ।
ओलीले नेपाल पक्षधर नेताहरुलाई छानिछानी कारवाहीको सुरुवाता गरेका छन् । केन्द्रदेखि तल्लो तहसम्म नेपालको पक्षमा लाग्नेहरुलाई पार्टीमा भूमिकाबिहीन बनाउने रणनीति उनको रहेको छ ।
नेपाल पक्षले ओलीको पेलान विरुद्ध कतिपय जिल्लामा समानान्तर कमिटी गठन गर्न सुरु गरिसकेको छ ।
प्रतिक्रिया