काठमाडौं । नेकपा एमालेको नेपाल पक्षीय स्थायी कमिटी बैठक जारी छ ।
कलंकीस्थित मेघा पार्टी प्यालेसमा जारी बैठकमा नेपाल पक्षले लिने नयाँ अभियानबारे छलफल भैरहेको छ ।
पार्टीभित्र अध्यक्ष एवं प्रधानमन्त्री केपी शर्मा ओलीले एकपछि अर्को गर्दै आफु सम्बद्ध नेताहरुमाथि कारवाही गर्न थालेपछि नेपाल पक्षले प्रतिवादको रणनीति बनाउन बैठक बसेको हो ।
अध्यक्ष ओलीले नवौं महाधिवेशनको विधान विपरित एकलौटी र स्वेच्छाचारी ढंगले पार्टीमा गुटगत गतिविधि बढाएको नेपाल पक्षको ठहर छ । नेपाल पक्षले ओलीले एमाले पार्टी मात्रै नभएर सिंगो कम्युनिष्ट आन्दोलनलाई नै तहसनहस गर्न लागेको आरोप लगाएको छ ।
वरिष्ठ नेता नेपालसहित भीम रावल, घनश्याम भुसाल र सुरेन्द्र पाण्डेलाई ओलीले ६ महिनाका लागि साधारणसदस्यबाट समेत निलम्बन गरेका छन् । ओलीले आफुले भनेअनुसार नसच्चिए उनीहरुलाई थप कडा कारवाही गर्ने चेतावनी दिएका छन् । तर, कारवाहीमा परेका चारै नेताले ओली आफै एमालेको अवैधानिक अध्यक्ष भएको र उनले विधान विपरित गरेको कारवाहीको कुनै औचित्य नभएको बताउँदै आएका छन् ।
अहिलेसम्म प्रतिक्रियात्मक अवस्थामा रहेको नेपाल पक्षले सधैंभर यसरी बस्न नसक्ने निस्कर्षमा पुगेको छ । प्रतिििक्रयात्मक मात्रै बन्दा थप बढी क्षति हुनसक्ने भन्दै नेपाल पक्ष आक्रमण ढंगले देशव्यापी समानान्तर पार्टी कमिटीहरु गठन गर्न सुरु गरेको छ । नेपाल पक्षले ओली एकलौटी रुपमा चल्न थालेको भन्दै अब उनीसँग आरपार सम्म गर्नुपर्ने अवस्था आउने सोचाइमा पुगेको बताइएको छ ।
प्रतिक्रिया