बुटवल । लुम्बिनी प्रदेशकै एक मन्त्रीले सरकार छिटै परिवर्तन हुने दाबी गरेका छन् ।
प्रदेशका आन्तरिक तथा कानुन मन्त्री कुलप्रसाद केसीले बुटवलमा आइतबार रिपोर्टस क्लबले आयोजना गरेको कार्यक्रममा प्रदेश सरकार छिट्टै परिवर्तन हुने दावी गरेका हुन् ।
पत्रकार महासंघका नवनिर्वाचित पदाधिकारीलाई बधाई तथा सम्म्मान कार्यक्रममा बोल्दै मन्त्री केसीले केन्द्रमा राजनीतिक परिवर्तन भएका कारण त्यसको प्रभाव प्रदेशमा पनि परेको जनाउँदै प्रदेश सरकारसमेत परिवर्तन हुने जिकिर गरेका हुन् । उनले सरकार परिवर्तनका लागि प्रदेशसभामा क्रियाशील राजनीतिक दलहरुसँग छलफल भैरहेको बताए ।
केसीले प्रदेशको राजनीति पनि विधि र विधान अनुसार नै चल्ने भएकाले छिट्टै निकास निस्कने अपेक्षा गरे । केसी माओवादी केन्द्रबाट प्रतिनिधित्व गर्दै लुम्बिनी प्रदेशमा मन्त्री छन् । उनीसँगै माओवादी केन्द्रबाट सुदर्शन बराल समेत मन्त्री रहेका छन् ।
मुख्यमन्त्री शंकर पोखरेलले भने आफ्नो सत्ता जोगाउनका लागि जनता समाजवादी पार्टीसँग छलफल गरिरहेका छन् ।
प्रतिक्रिया