डोटी । भारतबाट रोजगारी गरी घर फर्किएका ५९ जनामा कोरोना संक्रमण पुष्टि भएको छ ।
प्रदेश स्वास्थ्य निर्देशनालय दिपायल राजपुरका अनुसार सुदूरपश्चिमको गौरीफन्टा नाका हुँदै नेपाल फर्किएका कम्तीमा पनि १ हजार ४५ जनामध्ये ४७५ जनाको एन्टिजेन परीक्षण गर्दा ५९ जनामा कोरोना संक्रमण पुष्टि भएको हो ।
पछिल्लो समय भारतबाट रोजगारी गरी घर फर्किएका सुदूरपश्चिम प्रदेशका नागरिकमा कोरोना संक्रमण बढ्ने क्रम देखिएको छ ।
कोरोना संक्रमण बढ्दै गएको र डोटीका स्थानीय तहमा रहेका स्वास्थ्य संस्थाले कोरोना रोकथामका लागि खासै उल्लेख्य कदम चाल्न नसकेको भन्दै स्थानीयमा त्रास उत्पन्न हुन थालेको दिपायल सिलगढी नगरपालिका-४ का वीरबहादुर विष्टले बताए ।
‘भारतबाट काम गरी फर्किने नागरिकमा कोरोना देखिँदैछ, रोकथामका लागि खासै पहल भएको छैन, त्रास नभए के हुनु,’ उनले भने ।
जिल्लाका स्थानीय तहले भारतबाट घर फर्किएका नागरिकलाई राख्नका लागि क्वारेन्टीन समेत निर्माण नगरेकाले उनीहरू सिधै आ-आफ्ना घर जान थालेको बताइएको छ ।
नागरिक सिधै गाउँ पस्न थालेका कारण गाउँघरमा कोरोना संक्रमण बढ्दै जाने तथा पछि गएर कोरोनाले महामारीको रूप लिन सक्नेभन्दा यहाँका गाउँघरमा रहेका नागरिकमा त्रास उत्पन्न हुन थालेको हो ।
डोटीको स्थानीय प्रशासनले भारतबाट रोजगारी गरी घर फर्किएका नागरिकलाई अनिवार्य १५ दिन क्वारेन्टीन राख्नुपर्ने निर्णय गरेको भए पनि निर्णयको पालना नहुँदा झनै समस्या भएको बताइएको छ । रासस
प्रतिक्रिया