काठमाडौं । नेकपा माओवादी केन्द्रले राष्ट्रिय सभाका अर्का एक सांसदलाई कारवाही गरेको छ ।
राष्ट्रिय सभा सदस्य अर्घाखाँचीका चन्द्रबहादुर खड्काले दल त्याग गरेको सूचना माओवादी केन्द्रले संसद सचिवालयमा दर्ता गरेको छ ।
राष्ट्रिय सभामा माओवादी केन्द्र दलका नेता दीनानाथ शर्माले खड्काले दल त्याग गरको पत्र संसद सचिवालयलमा दर्ता गराउँदै खड्काले दल त्याग गरेको जानकारी गराएका छन् । यससँगै खड्काको सांसद पद अब खारेज हुनेछ ।
खड्काले दल त्याग गरेको हुँदा उनलाई राष्ट्रिय सभाबाट हटाउनका लागि माओवादी केन्द्रका अध्यक्ष पुष्पकमल दाहाल प्रचण्डले दलका नेता दीनानाथ शर्मालाई पत्र लेखेका थिए । शर्माले सोही पत्रका आधारमा संसद सचिवालयलाई राजनीतिक दलसम्बन्धी ऐनको दफा ३४ (२) बमोजिम अर्को पत्र लेख्दै खड्काले दल त्याग गरेको जानकारी गराएका हुन् ।
यसअघि राष्ट्रिय सभाकै सदस्य रहेका गृहमन्त्री रामबहादुर थापाले दल त्याग गरेको पत्र माओवादी केन्द्रले संसद सचिवालयमा बुझाएसँगै उनको सांसद पद खारेज भएको थियो ।
निर्वाचन आयोगले थापाको रिक्त भएको पदमा जेठ ६ गते पुनः निर्वाचन गर्ने जनाएको छ ।
प्रतिक्रिया