काठमाडौं । मुलुकमा स्थानीय वायुको प्रभावले आज उच्च पहाडी र हिमाली भेगमा बदलीको अवस्था रहेको जल तथा मौसम पूर्वानुमान महाशाखाले जनाएको छ ।
पूर्वी भू-भागमा अहिले न्यून चापीय रेखाको प्रभाव रहेको महाशाखाले जनाएको छ । अहिले प्रदेश १ तथा प्रदेश २ का केही भू-भाग लगायत देशको उच्च पहाडी तथा हिमाली क्षेत्रका केही स्थानमा आंशिक बदली भएको छ । अरु क्षेत्रको मौसम सामान्यतया सफा रहेको छ ।
मंगलबार दिउँसो प्रदेश १, प्रदेश २ लगायत देशका अन्य पहाडी भू-भागमा आंशिक बदली रही बाँकी क्षेत्रको मौसम सामान्यतया सफा रहनेछ । पहाडी भू-भागका एक/दुई स्थानमा अपरान्हपछि मेघ गर्जन र चट्याङ्ग तथा हावाहुरीसहित क्षणिक वर्षाको सम्भावना छ ।
यस्तै राति पहाडी भू-भागमा आंशिक बदली रही बाँकी क्षेत्रको मौसम सामान्यतया सफा रहने मौसमविदले बताएका छन् । यसैबिच देशभर अधिकतम र न्यूनतम तापक्रममा बृद्धि भइरहेकोले गर्मी बढ्ने हुँदा सम्भावित असरबाट बच्न तथा पहाडी भू-भागका थोरै स्थानमा अपरान्हपछि मेघ गर्जन र चट्याङ्ग तथा हावाहुरीसहित क्षणिक वर्षाको सम्भावना रहेकोले आवश्यक सतर्कता अपनाउन मौसमविदले आग्रह गरेका छन ।
प्रतिक्रिया