काठमाडौं । राष्ट्रिय सभामा बागमती प्रदेशबाट रिक्त स्थानमा डाक्टर खिमलाल देवकोटालाई साझा उम्मेदवार बनाइने भएको छ ।
माओवादी केन्द्र, कांग्रेस र एमालेको माधव नेपाल पक्षले स्वतन्त्र बुद्धिजीवि डा. देवकोटालाई साझा उम्मेदवार बनाउने निर्णय गरेका हुन् ।
देवकोटा नेपाल निकट बुद्धिजीवि मानिन्छन् । विकास अर्थशास्त्रमा विद्यावारिधि गरेका देवकोटा संघीयताका विज्ञ हुन् । देवकोटाले प्रधानमन्त्री कार्यालय र राष्ट्रिय योजना आयोगमा पनि विज्ञ सल्लाहकारका रुपमा काम गरिसकेका छन्।
माओवादी केन्द्रबाट निर्वाचित रामबहादुर थापाले दल त्याग गर्दै एमालेमा प्रवेश गरेपछि राष्ट्रिय सभाको सो स्थान रिक्त भएको थियो ।
राष्ट्रिय सभाको उपनिर्वाचन आगामी जेठ ६ गते हुँदैछ । सो उपनिर्वाचनमा बागमती प्रदेशका प्रदेशसभा सांसदहरु र स्थानीय तहका प्रमुख उपप्रमुखहरुले मतदान गर्न पाउँछन् ।
एमालेले रामबहादुर थापालाई नै उम्मेदवार बनाउने निर्णय गरिसकेको छ ।
लुम्बिनी प्रदेशमा रिक्त एक पदमा विपक्षी गठबन्धनले केही दिनअघि एमालेको लुम्बिनी प्रदेशसभा सांसद पदबाट राजीनामा दिएका कपिलवस्तुका दृघनारायण पाण्डेलाई साझा उम्मेदवार बनाउने निर्णय गरेका छन् ।
प्रतिक्रिया