काठमाडौं । बागमती प्रदेशमा रिक्त राष्ट्रियसभा सदस्य पदका उम्मेदवार खिमलाल देवकोटाले आफ्नो उम्मेदवारी फिर्ता नलिने स्पष्ट पारेका छन् ।
जेठ ६ गते हुन गइरहेको उपनिर्वाचनमा कांग्रेस, माओवादी केन्द्र र एमालेको माधव नेपाल पक्षको समर्थनमा उम्मेदवार रहेका देवकोटा उम्मेदवार रहेका छन् । तर एमाले नेताहरुबीच देखिएको विवाद समाधानउन्मुख देखिएपछि देवकोटाको उम्मेदवारी के हुन्छ भन्ने चासो बढिरहेकै समयमा उनले आफुले उम्मेदवारी फिर्ता नलिने स्पष्ट पारेका हुन् । देवकोटा माधव नेपाल निकट बुद्धिजीवि हुन् ।
देवकोटाले शुक्रबार विज्ञप्ति निकालेर भनेका छन्, ‘नेपाली कांग्रेस, नेकपा माओवादी केन्द्र र जनता समाजवादी पार्टीलगायत अन्य दलको समर्थन र सहयोगबाट मैले उम्मेदवारी दिएको स्थितिमा यसमा पुर्नविचार गर्ने कुरा कल्पनाभन्दा बाहिरको विषय हो ।’
निष्ठा र इमान्दारिताको राजनीतिप्रति गहिरो लगाव रहेको उल्लेख गर्दै देवकोटाले केन्द्रमा राजनीतिक घटनाक्रम फेरबदल भएपनि आफुले उम्मेदवारी फिर्ता नलिने स्प्ष्ट पारेका छन् । देवकोटाले भनेका छन्, ‘राजनीतिक दलहरुले म प्रति गर्नुभएको विश्वाश र भरोसाप्रति उच्च सम्मान व्यक्त गर्दछु । संविधानप्रदत स्थानीय र प्रदेशका अधिकारहरु विना व्यवधान कार्यान्वयन हुनुपर्दछ भन्ने मान्यतामा म दृढ छु । मेरो उम्मेदवारी पनि यही विचारबाट अभिप्रेरित छ ।’
देवकोटा कलम चुनाव चिन्ह लिएर मैदानमा रहेका छन् । उपनिर्वाचनमा देवकोटाबाहेक एमालेको तर्फबाट गृहमन्त्री रामबहादुर थापा र नेमकिपाको तर्फबाट कृष्ण तामाङ उम्मेदवार छन् ।
२०७४ सालमा भएको निर्वाचनमा माओवादी केन्द्रबाट गृहमन्त्री थापा विजयी भएका थिए। तर, दल त्याग गरेर एमाले प्रवेशगरेपछि दल त्याग ऐनअनुसार उनको पद खारेज भएको थियो ।
देवकोटाको वक्तव्य
प्रतिक्रिया