काठमाडौं । प्रधानमन्त्री केपी शर्मा ओलीले विश्वासको मत गुमाएका छन् ।
प्रतिनिधिसभामा विश्वासको मतका लागि केहीबेर अघि भएको मतदानमा प्रधामन्त्री ओलीले विश्वासको मत गुमाएका हुन् ।
ओलीको पक्षमा ९४ मात्र मत परेको छ भने विपक्षमा १२४ मत परेको छ ।
मतदानमा एमालेको माधव नेपाल पक्षका २८ जना सदस्यहरु अनुपस्थित भएका छन् । जम्मा ३९ जना सांसद अनुपस्थित भएका छन् । यस्तै तटस्थमा १५ मत परेको छ । मतदानमा जम्मा २३२ जना उपस्थित भएका थिए ।
प्रधानमन्त्रीले संविधानको धारा १०० को उपधारा १ बमोजिम आफुलाई संसदको विश्वास छ भन्नका लागि मतदान भएको हो ।
संसदमा हाल कायम रहेका २७१ सदस्यसंख्यामध्ये प्रधानमन्त्रीले विश्वासको मत पाउन १३६ मतको आवश्यकता पर्दथ्यो ।
विश्वासको मत अस्वीकृत भएसँगै प्रधानमन्त्री ओली स्वतः पदमुक्त भएका छन् । ओली सरकार कामचलाउ सरकारमा परिणत भएको छ ।
अब राष्ट्रपतिले संविधानको धारा ७६ को उपधारा २ अनुसार नयाँ सरकार बनाउनका लागि आह्वान गर्नेछिन् ।
प्रतिक्रिया