काठमाडौं । नेकपा एमालेले माधव नेपालसहित चार नेतामाथिको निलम्बन फुकुवा गरेको छ ।
एमाले स्थायी कमिटीको आज बसेको बैठकले नेता नेपालसहित घनश्याम भुसाल, भीम रावल र सुरेन्द्र पाण्डेलाई यसअघि गरेको निलम्बन फुकुवा गरेको हो ।
नेता नेपाल पक्ष निकट सांसदहरुले सामुहिक राजीनामा दिने तयारी गरेपछि उनीहरुलाई फकाउन अध्यक्ष ओलीले कारवाही फुकुवा गरेका हुन् ।
नेपाल पक्षले राजीनामा नदिए आफ्नो नेतृत्वको सरकार टिकिरहने भएका कारण ओलीले उनीहरु विरुद्धको कारवाही स्थायी कमिटी बैठकमार्फत फुकुवा गरेका हुन् । बैठकमा पार्टीलाई एक बनाइराख्न कारवाही फुकुवा गर्नुपरेको ओलीले बताएका थिए ।
बैठकले पार्टी एकता कायम राख्न यस्तो निर्णय लिएको नेता सुवास नेम्वाङले बताए । बैठकले माधव नेपालसँग कुरा गर्न अध्यक्ष ओलीलाई जिम्मेवारी दिने निर्णय समेत गरेको छ ।
ती चार नेतामाथि अरुको एजेण्डा बोकेर पार्टी ध्वस्त पार्न लागेको अभियोग लगाउँदै ओलीले ६ महिना साधारण सदस्यतबाट समेत निलम्बन गरेका थिए ।
प्रतिक्रिया