कांग्रेस संसदीय दलको कार्यसमिति बैठक बस्दै

काठमाडौं । नेपाली कांग्रेस संसदीय दलको कार्यसमिति बैठक आज बस्दैछ ।
संसद भवन नयाँ वानेश्वरस्थित ल्होत्से हलमा दिउँसो साढे २ बजे बैठक बस्ने कांग्रेसले जनाएको छ ।

बैठकमा बजेट, कोरोना संकट र सरकारको विषयमा छलफल हुने बताइएको छ । कांग्रेसले अल्पमतको सरकारले संसद छलेर अध्यादेशबाट बजेट ल्याउन लागेको आशंका गरेको छ । संसदमा विश्वासको मत नलिई पूर्ण बजेट ल्याउन नपाउने कांग्रेसको जिकिर छ । पूर्णबजेटका लागि ल्याउनुपर्ने नीति तथा कार्यक्रम र प्रिबजेटमाथि छलफलका लागि संसद चालु हुनुपर्नेमा सरकारले अहिलेसम्म संसद अधिवेशन नै बोलाएको छैन ।

यस्तै कांग्रेसले सरकार कोरोना महामारी नियन्त्रणमा पूर्णतः असफल भएको बताइरहेको छ । चारैतिरबाट असफल सरकारलाई विस्थापन गरेर अझै पनि संविधानको धारा ७६ को उपधारा ५ अनुसार नयाँ सरकार बनाउन सकिने अवस्था कायमै रहेका कारण कांग्रेसले आफ्नो धारणा बनाउन बैठक छसफल हुनेछ ।