काठमाडौं । नेपाली कांग्रेसले कोरोना संक्रमणबाट जनतालाई सुरक्षित राख्न सरकारसँग खोप सुनिश्चितताको माग गरेको छ ।
सभापति शेरबहादुर देउवाको नेतृत्वमा गएको कांग्रेस प्रतिनिधिमण्डलले सिंहदरबारमा बिहीबार प्रधानमन्त्री केपी शर्मा ओलीलाई भेटेर १५ बुँदे ध्यानाकर्षण पत्र बुझाउँदै खोप सुनिश्चितताको माग गरेको हो ।
त्यसक्रममा सभापति देउवालले प्रधानमन्त्री ओलीलाई जनताको जीवनप्रति जिम्मेवार बन्न आग्रह गरे ।
देउवाले जनतालाई कोरोनाको संभावित तेस्रो लहरबाट बचाउन तत्काल खोप ल्याएर लगाउनुपर्ने माग गरेका छन् । तेस्रो लहरले बालबालिकालाई धेरै असर गर्नसक्ने कुरा आएको बताउँदै देउवाले त्यसबारे सरकारले बेलैमा विशेष व्यवस्था गरोस् भन्ने माग गरेका छन् ।
देउवाले खोप खरिदमा अनियमितता भएको भन्दै छानविन गर्न पनि माग गरेका छन् । उनले अहिले देखिएको अक्सिजनको अभाव अन्त्य गर्न समेत माग गरेका छन् ।
कांग्रेसले आफ्नो ध्यानाकर्षणपत्रमा सीमा नाकाहरूमा पिसिआरको अनिवार्य व्यवस्था गर्न, माग गरेको छ । यसैगरी, निषेधाज्ञाको समयमा निम्न आय भएका नागरिकहरूलाई राहत उपलब्ध गराउन पनि माग गरेको छ ।
प्रधानमन्त्रीलाई ध्यानाकर्षण गराउन सभापति देउवासहित महामन्त्री पूर्णबहादुर खड्का, सहमहामन्त्री प्रकाशशरण महत, नेता रामशरण महतलगायतका नेताहरु पुगेका थिए ।
प्रतिक्रिया