काठमाडौं । नेकपा एमालेले पार्टीको उम्मेदवारको पक्षमा मत नदिनुलाई गम्भीर भएको निस्कर्ष निकालेको छ ।
प्रधानमन्त्री निवास बालुवाटारमा बसेको एमाले स्थायी कमिटी बैठकले पार्टीका उम्मेदवारको पक्षमा मत नदिई विपक्षमा मतदान गर्नुलाई पार्टी अनुशासनको गम्भीर उल्लंघन भएको ठहर गरेको हो । बैठकले आधिकारिक उम्मेदवार विरुद्ध मतदान गर्ने कार्यको भर्त्सना गरेको छ ।
राष्ट्रियसभाको उपनिर्वाचनमा पार्टीको निर्देशन अवज्ञा गर्ने नेता र पार्टी उम्मेदवारको विपक्षमा मतदान गर्ने जनप्रतिनिधिका क्रियाकलाप क्षमायोग्य नरहेको एमालेले निस्कर्ष निकालेको हो ।
बैठकपछि संचारकर्मीसँग कुरा गर्दै प्रवक्ता प्रदीप ज्ञवालीले बैठकमा पार्टीका उम्मेदवार रामबहादुर थापालाई मतदान नगरेको विषयमा छलफल भएको बताए । बैठकमा माधवकुमार नेपाल पक्षका जनप्रतिनिधिले थापालाई मतदान नगरेकोबारे छलफल भएको थियो । प्रवक्ता ज्ञवालीले पार्टीमा एकताभावका लागि कार्यदल बनेपछि पनि पार्टीका विपक्षमा मतदान गर्ने कुरालाई सामान्य रूपमा लिन नसकिने जनाए । ज्ञवालीले भने, ‘कार्यदल बनिसकेपछि त्यो भन्दा अगाडि र पछाडिका कुरालाई एउटै ढंगले हेर्न मिल्दैन । यो विषय असाध्यै गम्भीरतापूर्वक लिएका छौं ।’
नेपाल पक्षले विपक्षी गठबन्धनसँग मिलेर आफु निकट डा. खिमलाल देवकोटालाई उम्मेदवार बनाएको थियो । पार्टीका उम्मेदवारलाई भोट दिन एमाले अध्यक्ष केपी शर्मा ओली र महासचिव इश्वर पोखरलेले पार्टीबाट निर्वाचित जनप्रतिनिधिहरुलाई निर्देशन दिएका थिए ।
प्रतिक्रिया