नेपालगन्ज । भेरी अस्पताल नेपालगन्जमा स्वास्थ्यकर्मीमाथि आक्रमण गर्ने ३ जना विरुद्ध ज्यान मार्ने उद्योग अन्तर्गत मुद्दा दर्ता भएको छ । पक्राउ परेका उनीहरुले अस्पतालमा कार्यरत एकजना नर्सलाई घाँटी च्यापेर आक्रमण गरेको र अन्यलाई पनि साँघातीक आक्रमण गरेको अभियोग लगाउँदै बाँके प्रहरीले ज्यान मार्ने उद्योग अन्तर्गत मुद्दा दर्ता गराएको हो ।
उनीहरु विरुद्ध जिल्ला अदालत बाँकेमा ज्यान मार्ने उद्योग अन्तर्गत मुद्दा दर्ता भएको बाँकेका प्रहरी प्रवक्ता नायव प्रहरी उपरिक्षक सुभास खड्काले बताए । उनीहरुलाई आजै प्रहरीले अदालतबाट म्याद थप गराई अनुसन्धान गरिरहेको डीएसपी खड्काले बताए ।
कोरोना संक्रमण भई भेरी अस्पतालमा उपचार गराईरहेका दाङका डिल्ली बहादुर रावतको बिहिबार राती मुत्यु भएपछि मृतकका भाई मानबहादुर रावत र छोराहरु भरत राउत र लोकराज रावत समेतले अस्पतालका नर्सिङ स्टाफ सुदिक्षा गैरेको घाँटी च्यापेर मार्न खोजेका थिए भने डा. चन्द्रप्रकाश शाहु, नर्सहरु बन्दना श्रेष्ठ र आश्वीनी गुरुङलाई सांघातीक आक्रमण गरेका थिए । उनीहरु आक्रमणकारीबाट ज्यान जोगाउन बाथरुमको झ्याल फोडेर पहिलो तलाबाट हाम्फालेका थिए ।
स्वास्थ्यकर्मीमाथि आक्रमण गर्ने मृतकका भाई तुलसीपुरका मानबहादुर रावत र छोराहरु भरत राउत र लोकराज रावतमाथि मुद्दा दर्ता भएको र अन्यको खोजि भईरहेको डीएसपी खड्काले बताए ।
प्रतिक्रिया