एमाले स्थायी कमिटी बैठक फेरि स्थगित

खबर कुरा
१७ जेष्ठ २०७८, सोमबार
                 

काठमाडौं । नेकपा (एमाले)को स्थायी कमिटी बैठक फेरि सरेको छ । प्रधानमन्त्री निवास बालुवाटारमा आज बिहान १० बजे बोलाइएको बैठक मंगलबार बिहान ११ बजे मात्र बस्ने भएको हो । यसअघि आइतबार साँझ ५ बजे बस्ने भनिएको बैठक आज बिहान १० बजेका लागि सारिएको थियो ।

शीर्ष नेताको व्यस्तताका कारण बैठक सारिएको एमाले पार्टी कार्यालयका सचिव शेरबहादुर तामाङले बताएका छन् । स्थायी कमिटीका केही नेताहरु लुम्बिनी प्रदेशमा रिक्त राष्ट्रियसभाको पदका लागि आज हुन लागेको उपनिर्वाचनमा व्यस्त हुँदैछन् ।

अब भोलिका लागि सारिएको बैठकमा पार्टी अनुशासन उल्लंघन गरेको आरोपमा थप नेताहरुलाई कारावाहीको निर्णय हुनसक्ने बताइएको छ । विपक्षी गठबन्धनलाई सघाएको आरोपमा एमालेले घनश्याम भुसाल, सुरेन्द्र पाण्डे, विरोध खतिवडालगायत १२ जना नेताहरुलाई स्पष्टीकरण सोधेको थियो ।

स्पष्टीकरण सोधिएका अन्य नेताहरुमा सोमप्रसाद पाण्डे, जीवनराम श्रेष्ठ, कृष्णलाल महर्जन, झपट रावल, भवानीप्रसाद खापुङ, यज्ञ सुनुवार, मेटमणि चौधरी, दीपकप्रकाश भट्ट र नारायण खतिवडा छन् । २४ घण्टे स्पष्टीकरण मागिए पनि बाह्रै जनाले स्पष्टीकरण बुझाएका छैनन् ।

त्यसअघि जेठ १० गते बसेको एमाले स्थायी कमिटी बैठकले झलनाथ खनाल, माधवकुमार नेपालसहित ११ नेतालाई पार्टीको साधारण सदस्य समेत नरहने गरी निस्काशन गरेको थियो ।

बैठकमा शनिबार प्रस्तुत गरिएको आर्थिक वर्ष २०७८/०७९ को बजेटको समीक्षा र चुनावको तयारीबारे समेत छलफल हुने बताइएको छ ।

यसमा तपाइको मत

Your email address will not be published. Required fields are marked *


*