काठमाडौं । नेकपा एमालेको नेपाल-खनाल पक्ष निकट जनसंगठनहरुले अध्यक्ष केपी शर्मा ओलीले आफुहरुका सर्त मान्न तयार नभए अलग पार्टी गठन हुने चेतावनी दिएका छन् ।
नेपाल खनाल पक्षीय केन्द्रीय कमिटीको बैठक चलिरहेकै समयमा बिहीबार विभिन्न १७ वटा जनसंगठनहरुले सामुहकि विज्ञप्ति जारी गर्दै पार्टी संरचना, विधान र नेतृत्व २ जेठ २०७५ अगाडिको अवस्थामा नल्याइए अलग पार्टी बनाउने चेतावनी पनि दिएका हुन् ।
विज्ञप्तिमा भनिएको छ, ‘जनताको लामो र कठोर संघर्षबाट प्राप्त उपलब्धिहरुको रक्षाको निम्ति, गौरवमय इतिहास बोकेको पार्टी र आन्दोलनको रक्षाको निम्ति पार्टीलाई नयाँ शिराबाट एकताबद्ध गरेर क्रान्तिको नयाँ झन्डा उठाउनुपर्नेछ । इतिहासको यो आदेश र आवश्यकताका निम्ति नयाँ प्रतिवद्धता र दृढताका साथ उभिन हामी तयार रहेको पनि जानकारी गराउन चाहन्छौं ।’
जनसंगठनका प्रमुखहरुले फागुन २८ पछि अध्यक्ष ओलीले गरेका पार्टी विधान विपरितका सबै निर्णय सच्चाउन माग गरेका छन् । उनीहरुले पार्टीको नवौं राष्ट्रिय महाधिवेशनको मार्गनिर्देशन र पार्टी विधानको विपरीत बनेको अवैध कमिटी र अध्यक्षले गरेको स्वेच्छाचारी कारबाही अर्थहीन भएको जिकिर गरेका छन् । पार्टी नेताहरुलाई अवैधानिक ढंगले निष्कासन फिर्ता लिन पनि उनीहरुले माग गरेका छन् ।
नेपाल खनाल पक्षको आज बसेको बैठकमा ओली पक्षसँग वार्तामा बसेका नेताहरुले अहिलेसम्मको अवस्थाबारे जानकारी गराएका थिए । घनश्याम भुसाल र सुरेन्द्र पाण्डेले पार्टी एकता वचाउन अन्तिमसमयसम्म प्रयत्न जारी राख्न खोजेको बताउँदै ओली पक्षले आफुहरुलाई भुलाउन मात्र लागेको बताएका छन् ।
प्रतिक्रिया