नेपालगन्ज । दोस्रो लहरको कोरोना माहामारी केही मत्थर हुन थालेसँगै बैशाखको पहिलो साताबाट बन्द रहेको भेरी अस्पतालको ओपीडी सेवा आजबाट सुचारु गरिएको छ । कोरोना भाइरस संक्रमण तिब्र रुपमा फैलिएपछि बन्द गरिएको भेरी अस्पतालको ओपीडी संक्रमणको दर घट्दै गएपछि आजबाट संचालन गरिएको हो । कोरोना संक्रमित थपिने दर उच्चरुपमा बढेसँगै भेरी अस्पतालमा ओपीडी सेवा बन्द गरेर कोभिड डेडिकेटेड सेवा संचालन गरिएको थियो ।
कोभिड अस्पतालकारुपमा सेवा दिने क्रममा अस्पतालले कोरोना संक्रमित बिरामीको उपचार, संक्रमित बिरामीको शल्यक्रिया लगायतका सेवा दिईरहेको थियो । भेरी अस्पतालले नेपालमै सबै भन्दा ठुलो संख्यामा कोरोना संक्रमितको उपचार सेवा दिएर महामारीको बेला रेकर्ड कायम गरेको थियो । १४० वटा कोरोना संक्रमितका लागि बेड व्यवस्थापन गरेपनि अस्पतालले झण्डै ३०० संक्रमितलाई एकैपटक सेवा दिएको थियो ।
पछिल्ला सातादेखि लगातार संक्रमितको संख्या घट्दै गएपछि अस्पतालले ओपीडी सेवा संचालन गर्ने निर्णय गरेको अस्पताल विकास समितिका सदस्य कृष्णप्रसाद श्रेष्ठले बताए । पहिलो चरणमा एक सातासम्म एक बजेसम्म सेवा ओपीडी संचालनमा रहने र क्रमश पूर्ववत सेवा सुचारु हुने उनले बताए ।
अस्पतालको कोरोना वार्डमाअहिले पनि ७३ जना संक्रमित बिरामीले स्वास्थ्य लाभ गरिरहेका छन् ।
यसअघि नेपालगञ्ज मेडिकल कलेज शिक्षण अस्पताल कोहलपुरले पनि ओपीडी सेवा शुरु गरिसकेको छ ।
प्रतिक्रिया