बुटवल । आज (शनिबार) राति चारवटा प्रदेशका केही स्थानहरुमा भारी वर्षा हुने सम्भावना रहेको जल तथा मौसम विज्ञान विभागले जनाएको छ ।
विभागको मौसम पूर्वानुमान महाशाखाले साँझ ६ बजे जारी गरेको मौसम पूर्वानुमान बुलेटिन अनुसार राती देशभर सामान्य देखि पूर्ण बदली रहने छ । देशका धेरै स्थानहरुमा हल्का देखि मध्यम वर्षाको सम्भावना रहेको उल्लेख गर्दै महाशाखाले लुम्बिनी प्रदेश तथा बागमती प्रदेशका थोरै स्थान र प्रदेश १, गण्डकी प्रदेशका एक-दुई स्थानहरुमा मेघगर्जन तथा चट्टयाङ्ग सहित भारी वर्षाको सम्भावना रहेको सूचित गरेको छ ।
महाशाखाका अनुसार अहिले पनि देशका विभिन्न स्थानमा वर्षा भइरहेको छ । पूर्वानुमान महाशाखाले आईतबारको मौसमको पूर्वानुमान गर्दै देशका अधिकांश स्थानमा हल्कादेखि मध्यम वर्षाका साथै लुम्बिनी प्रदेशका केही र प्रदेश १, गण्डकी प्रदेश, बागमती प्रदेश तथा सुदूरपश्चिम प्रदेशका थोरै स्थानमा भारी वर्षा हुने छ । त्यसैगरि लुम्बिनी प्रदेशका एक वा दुई स्थानमा धेरै भारी वर्षा हुने सम्भावना रहेकाले उक्त प्रदेशको पहाडी भूभागमा पहिरो तथा गेग्रान बहावको जोखिम रहेको, नदीनाला तथा खहरे खोलामा पानीको सतह बढ्न सक्ने तथा यातायात क्षेत्र प्रभावित हुन सक्ने भएकाले आवश्यक सतर्कता अपनाउन माहाशाखाले सबैमा अनुरोध समेत गरेको छ ।
प्रतिक्रिया