काठमाडौं । काठमाडौं उपत्यकाका तीन जिल्ला (काठमाडौं, भक्तपुर र ललितपुर) का प्रमुख जिल्ला अधिकारीहरु (सीडीओ)हरुको बैठक सकिएको छ । तर निषेधाज्ञाबारे निर्णय भोलि मात्रै गरिने भएको छ ।
आज बसेको बैठकले मोडालिटी कस्तो बनाउने भन्ने विषयमा छलफल गरेपनि त्यसबारे थप भोलि निर्णय गरिने काठमाडौंका सीडीओ कालीप्रसाद पराजुलीले जानकारी दिए ।
उनले सार्वजनिक यातायात सञ्चालनको सन्दर्भमा प्रस्ताव आएपनि त्यसबारे आपसी छलफल गरेर मात्रै थप निर्णय गरिने बताए ।
संक्रमण दरको अवस्था पनि विश्लेषण गरिरहेको प्रजिअ पराजुलीले बताए । जनस्वास्थ्य कार्यालयको रिपोर्टअनुसार अहिले काठमाडौंको संक्रमणदर १२/१३ प्रतिशत रहेको उनको भनाई छ ।
“आजको बैठकले निषेधाज्ञा थप गर्नेबारे अनौपचारिक निर्णय गरेको छ तर कति समय थप गर्ने भन्ने विषयमा भोलि मात्रै निर्णय हुनेछ ।” उनले भने- “सार्वजनिक यातायात सञ्चालनको सवालमा प्रस्ताव भने आएको छ तर त्यसबारे भोलि आपसी छलफल गरेर मात्रै निर्णय गरिनेछ ।”
आज बसेको ललितपुरको डीसीसीएमसीको बैठकले सार्वजनिक यातायात सञ्चालनको प्रस्ताव तीनै जिल्लाको बैठकमा लैजाने निर्णय गरेको थियो ।
प्रतिक्रिया