काठमाडौं । एमालेको एकताका लागि पुनः ब्ष्युँतिएको कार्यदलको आजको बैठक भोलि दिउँसो बस्ने गरी सकिएको छ ।
सिंहदरबारमा बसेको एकता कार्यदलको बैठक अनौपचारिक रूपमा भएका छलफलहरूको पुनरावलोकन गर्दै भोलि १ बजे फेरि बस्ने गरी सकिएको कार्यदलका एक सदस्यल् बताए । ‘आजसम्म भएका अनौपचारिक छलफलको पुनरावलोकन भयो र भोलि १ बजे बस्ने निर्णय भयो ।’ ती सदस्यले भने ।
आइतबार राति बालुवाटारमा अध्यक्ष ओलीसँगको वार्तामा नेता भीम रावलले कार्यदल ब्युँताएर एकताको प्रक्रिया टुंग्याउनुबाहेकको अरु विकल्प नभएको बताए पछि निष्क्रिय रहेको कार्यदल ब्युँताउन ओली सहमत भएका थिए । ओली कार्यदल ब्युँताउन सहमत भएसँगै गत ५ जेठदेखि निष्क्रिय रहेको कार्यदलको बैठक बसेको हो ।
ओलीले दोस्रोपटक प्रतिनिधिसभा विघटन गराएर कार्यदलकै नेपाल पक्षका संयोजक रावललाई पार्टीबाट निस्काशन गरे पछि कार्यदल निष्क्रिय जस्तै बनेको थियो ।
पार्टी एकतासम्बन्धी विवाद समाधानका भन्दै ओली र नेपाल पक्षका ५-५ जना रहने गरि गत जेठ २ गते कार्यदल गठन भएको थियो ।
कार्यदलमा ओली तर्फबाट सुवास नेम्वाङको संयोजकत्वमा विष्णु पौडेल, शंकर पोखरेल, प्रदीप ज्ञवाली र विष्णु रिमाल छन् । नेपाल पक्षबाट भीम रावलको संयोजकत्वमा घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त सदस्य छन् ।
प्रतिक्रिया