काठमाडौं । नेपाली कांग्रेसका पदाधिकारी तथा पूर्वपदाधिकारीको बैठक आज बस्न लागेको छ ।
प्रधानमन्त्री एवम कांग्रेस सभापति शेरबहादुर देउवाको निजी निवास बुढानिलकण्ठमा आज बिहान ९ बजे पदाधिकारी बैठक बस्न लागेको हो ।
बैठकमा आगामी १४ औं महाधिवेशनका विषयमा छलफल हुने कांग्रेसका मुख्यसचिव कृष्णप्रसाद पौडेलले बताए । आजको बैठकले महाधिवेशनको कार्यतालिकाबारे निर्णय गर्न सक्ने उनले बताए ।
यसअघि शनिबार बसको बैठकले गाउँ तथा नगर वडा अधिवेशन स्थगित गरेको थियो । क्रियाशील सदस्यता छानविन पूरा नभएकाले वडा अधिवेशन स्थगित गरेको थियो ।
आजको बैठकले त्यससम्बन्धी निर्णय गर्नसक्ने जनाइएको छ । यसअघि कांग्रेसको वडा अधिवेशन साउन १२ गते तोकिएको थियो । यस्तै, कांग्रेस क्रियाशील सदस्यता छानविन समितिले काम लगभग सकिएको जनाएको छ । आजै पार्टी सभापति देउवालाई प्रतिवेदन बुझाउने समितिका सचिव केवश रिजालले बताए ।
क्रियाशील सदस्यता छानविनका लागि असार ३० गतेसम्मको सयम दिइएको थियो । तर, विवाद भएपछि काम लम्बिएको हो ।
प्रतिक्रिया