काठमाडौं । लुम्बिनी प्रदेशसभाको विशेष अधिवेशन रोक्न माग गर्दै सर्वोच्च अदालतमा दायर रिट न्यायाधीस आनन्दमोहन भट्टराईको इजलासमा परेको छ ।
हिजो न्यायाधीस प्रकाशमानसिंह राउतको इजलासमा परेपनि यो रिट हेर्न नभ्याइने सूचीमा परेको थियो । यो रिट भट्टराईको इजलासमा आठौं नम्वरमा परेको छ । न्यायाधीस भट्टराईको इजलासमा परेको नम्वर हेर्दा दिउँसो१ बजेसम्म रिटमा फैसला हुने सम्भावना भने कम देखिन्छ ।
एमाले सांसद लिला गिरीले सोमबार दायर गरेको रिटमा आज दिउँसो १ बजेसम्म कुनै सुनवाइ नभए बुटवलमा प्रदेशसभाको विशेष अधिवेशन स्वतः अघि बढ्ने देखिएको छ । दिउँसो १ बजेको लागि प्रदेशसभा अधिवेशन बोलाइएको छ ।
लुम्बिनीका मुख्यमन्त्री शंकर पोखरेल विरुद्ध विपक्षी गठबन्धनले अविश्वासको प्रस्ताव दर्ता गराएका थिए । तर, सत्तारुढ नेकपा एमालेले भने संविधानको धारा १६८ को उपाधार १ अनुसार बनेको एकल बहुमतको सरकार विरुद्ध दुई वर्षसम्म अविश्वासको प्रस्ताव दर्ता गर्नै नपाइने जिकिर गर्दैआएको छ । एमालेले प्रदेशप्रमुखले असंवैधानिक रुपमा अधिवेशन बोलाएको भन्दै त्यसविरुद्ध सर्वोच्चमा रिट दायर गरेको हो ।
प्रतिक्रिया