बुटवल । लुम्बिनी प्रदेशका मुख्यमन्त्री शंकर पोखरेल विरुद्ध अविश्वासको प्रस्ताव दर्ता गराएका प्रदेशसभामा विपक्षी गठबन्धनका दलहरुको बैठक बसेको छ ।
लुम्बिनीस्थित लुम्बिनी गार्डेन रिसोर्टमा गठबन्धनका दलहरुको संसदीय दलको छुट्टाछुट्टै बैठक बसेको हो ।
आजै १ बजेबाट सुरु हुने प्रदेशसभाको विशेष अधिवेशनमा दलको भुमिकाका विषयमा छलफल गर्न विपक्षी दलहरुले आआफ्ना संसदीयदलको बैठक गरेका हुन् ।
२ दिनमा २ वटा रिसोर्टमा बसेका विपक्षी ४१ जना सांसदहरु बैठक पश्चात सिधै प्रदेशसभामा उपस्थित हुने तयारी गरिएको नेपाली कांग्रेस प्रदेश संसदीयदलका प्रमुख सचेतक फकरुद्दीन खानले बताए । खानले सत्तापक्षबाट बहिस्कार गरे पनि प्रदेशसभाको प्रक्रिया नरोकिने जनाउँदै सकेसम्म आजै मतदान प्रक्रियामा लैजाने बताए ।
यस्तै माओवादी केन्द्रकी सांसद दामा शर्माले पनि कोहि अनुपस्थित हुँदैमा विषेश अधिवेशन नरोकिने बताईन् । विशेष अधिवेशनको अर्थ निर्वाचन वा मतदान भएको स्पष्ट पार्दै सांसद शर्माले सत्तापक्ष आएपनि नआएपनि प्रक्रिया नरोकिने स्पष्ट पारिन । ‘विशेष भनेको विशेष नै हो, यो अगाडि बढ्छ रोकिँदैन’, उनले भनिन् ।
मुख्यमन्त्रीको राजीनामा आएको अवस्थामा बाहेक आजै नयाँ सरकार गठन हुने सांसद शर्माले दाबी गरिन् । ‘मुख्यमन्त्रीले राजीनामा दिनुभए अर्को प्रक्रिया सुरु होला, अन्यथा आजै मुख्यमन्त्रीमा कुलप्रसाद केसीको नियुक्ति हुन्छ’, शर्माले भनिन ।
प्रतिक्रिया