प्रदेश २ का १० एमाले सांसदले रोजे एकीकृत समाजवादी

जनकपुरधाम । प्रदेश २ प्रदेशसभाका १० जना एमाले सांसदले नेकपा एकीकृत समाजवादी रोजेका छन् ।

उनीहरुले बिहीबार जनकपुरधामस्थित प्रदेश निर्वाचन कार्यालयमा गएर एकीकृत समाजवादी दल रोजेको सनाखत गराएका छन् ।

एकीकृत समाजवादी रोज्ने सांसदहरुमा शत्रुधन महतो, प्रमोद यादव, रवीन्द्र बैठा, गोविन्दबहादुर न्यौपाने, हसिमा खातुन, अशोककुमार यादव, मञ्जुकुमारी यादव, बेची लुंगेली, नागेन्द्र राय यादव र मनोज सेन श्रीवास्तव छन् ।

एमालेमा माधवकुमार नेपालको पक्षमा रहँदै आएका सांसदहरु एकीकृत समाजवादीमा खुलेका हुन् । डिल्ली उप्रेती, सुन्दरबहादुर विश्वकर्मा र सिता गुरुङले समेत सोही पार्टीमा सखनात गर्ने बताइएको छ । यी मध्ये उप्रेती उपचारका लागि भारत गएका छन् भने विश्वकर्मा र गुरुङ खराब मौसमका कारण उपस्थित हुन नसकेको बताइएको छ ।

प्रदेशसभामा एमालेका २१ जना सांसद रहेका छन् । बाँकी ३ जना सांसले पनि एकीकृत समाजवादी रोजेमा एमाले भन्दा यो पार्टी ठूलो हुने देखिन्छ ।