काठमाडौं । प्रतिनिधिसभाको दोस्रो बैठकले तीनवटा विधेयक बहुमतले पारित गरेको छ ।
प्रमुख प्रतिपक्ष एमाले सांसदहरुको चर्को नाराबाजीका बीच शुक्रबारको बैठकबाट आर्थिक विधेयक, राष्ट्र ऋण उठाउने विधेयक र विनियोजन विधेयक बहुमतले स्वीकृत भएको हो ।
चर्काे नाराबाजी र अवराेधका बीच क्रमश: आर्थिक विधेयक, राष्ट्र ऋण उठाउने विधेयक र विनियोजन विधेयक निर्णयार्थ प्रस्तुत गरेका सभामुख अग्नीप्रसाद सापकोटाले ध्वनीमतका आधारमा बहमुतले विधेयक पारित भएको घोषणा गरेका छन् ।
प्रतिपक्षी एमालेका सांसदहरूले गरिरहेको अवरोधबीच सभामुख सापकोटाले प्रेम सुवाललाई आर्थिक अध्यादेश, २०७८ लाई अस्वीकार गरियोस् भन्ने प्रस्ताव राख्न दिएका थिए । सुवालले प्रस्तावको भन्दा एमसीसीका बिषयमा मात्र धारणा राख्दै रोष्टम नपाई प्रस्ताव पढेर नसुनाउने अडान लिएपछि सभामुख सापकोटाले अर्थमन्त्री जनार्दन शर्मालाई बिधेयक प्रस्तुत गर्न अनुमति दिएका थिए ।
त्यस अघि अर्थमन्त्री जनार्दन शर्मा ‘प्रभाकर’ ले आर्थिक अध्यादेश, २०७८ लाई स्वीकार गरियोस् भन्ने प्रस्ताव पेश गरेका थिए ।
अघिल्लो सरकारले ल्याएको बजेट अध्यादेश विस्थापित गर्न वर्तमान सरकारले आर्थिक प्रतिस्थापन विधेयक ल्याउन लागेको हो । एमालेले नाबाजी जारी राखेपछि सभामुखले पुनः १५ मिनेटका लागि बैठक स्थगित गरेका छन् ।
प्रतिक्रिया